Жаңа Конституцияны қабылдауға арналған жалпыхалықтық референдум өтуде. Осы науқанда Премьер-министр Олжас Бектенов елордадағы Дінмұхамед Қонаев атындағы №66 мектеп-лицейі ғимаратында орналасқан учаскеде дауыс беріп, өз таңдауын жасады, – деп хабарлайды «Dalamedia» ақпараттық порталы.

Орталық референдум комиссиясының мәліметінше, дауыс беру учаскелері таңғы сағат 07:00-де ашылып, кешкі 20:00-ге дейін жұмыс істейді. Учаскелер жабылғаннан кейін бюллетеньдер саналады. Кейбір учаскелер, негізінен әскери бөлімдерде, сағат 06:00-де ертерек жұмысын бастады. Ал шетелдегі дауыс беру Жапония мен Оңтүстік Кореяда жергілікті уақыт бойынша ұйымдастырылып жатыр.

Референдум бюллетенінде бір ғана сұрақ ұсынылған. Азаматтардан «2026 жылғы 12 ақпанда бұқаралық ақпарат құралдарында жарияланған Қазақстан Республикасының жаңа Конституциясын қабылдайсыз ба?» деген сауалға жауап беру сұралады. Дауыс берушілер «Иә, қабылдаймын» немесе «Жоқ, қабылдамаймын» деген нұсқалардың бірін таңдайды.

Жалпыұлттық референдумға 18 жасқа толған және сайлаушылар тізіміне енгізілген Қазақстан азаматтары қатыса алады.

Бұл күні бірқатар жоғары лауазымды тұлғалар да өз таңдауын жасады. Мәселен, Сенат төрағасы Мәулен Әшімбаев елордадағы Ұлттық академиялық кітапхана ғимаратында орналасқан №129 учаскеде дауыс берді.

Бұған дейін Мәжіліс төрағасы Ерлан Қошанов та референдумға қатысып, өз таңдауын жасаған болатын.

Сондай-ақ Қазақстанның Ұлттық олимпиада комитетінің президенті, «World Boxing» ұйымының басшысы Геннадий Головкин де референдумда дауыс берді. Бұл туралы Сыртқы істер министрлігі хабарлады.

Ал Оқу-ағарту министрі Жұлдыз Сүлейменова елордадағы Дінмұхамед Қонаев атындағы №66 мектеп-лицейінде орналасқан №130 учаскеге барып, жаңа Конституцияны қабылдау жөніндегі референдумда азаматтық міндетін орындады.