Алматыда желідегі парақшасында жаңа Конституция жобасына қатысты сауалнама жүргізген азамат әкімшілік жауапкершілікке тартылды, – деп хабарлайды «Dalamedia» ақпараттық порталы.

Алмалы аудандық прокуратурасы Жолдасбек Темірғалиевке Threads желісінде референдум тақырыбында сауалнама өткізгені үшін 15 АЕК, яғни 64 875 теңге көлемінде айыппұл салған. Желіде жарияланған сауалнамаға 2 880 қолданушы қатысқан. Прокуратура оны «заңсыз қоғамдық сауалнама жүргізді» деп танып, жазбаны өшіруін талап еткен.

Темірғалиевтің айтуынша, сауалнаманы ол бұрын телефон арқылы жүргізілген зерттеу деректерімен салыстыру үшін өткізген. Сол зерттеуде 1 200 қатысушының 78%-ы түзетулерді қолдағанын көрсеткен. «Бөлім прокурорының қабылдауына бардым. Айыппұл 15 АЕК (64 875 теңге). Алғашқы 7 күнде төлесем, 50%-дық жеңілдік бар», – деп жазды ол Threads парақшасында.

Заңнамаға сәйкес, референдумға қатысты сауалнама тек Қазақстанда тіркелген, кемінде 5 жыл тәжірибесі бар заңды тұлғаларға ғана рұқсат етіледі. Мұндай зерттеулер өткізер алдында Референдумнің орталық комиссиясын міндетті түрде хабардар ету қажет. Бұған дейін осындай себеппен «Уральская неделя» басылымы мен «Азаттық» радиосының тілшісі де айыппұл алған болатын.