Солтүстік Кореяның көшбасшысы Ким Чен Ын өз мұрагерінің есімін жария етті, — деп хабарлайды «Dalamedia» ақпараттық порталы BBC сайтына сілтеме жасап. Бұл туралы Сеулдің барлау қызметі хабарлады.

Ким Чен Ын өз қызы Ким Джу Әні мұрагер деп атады. Ол шамамен 13 жаста. Соңғы уақытта Джу Ә әкесімен бірнеше ресми шараға қатысқан. Оның ішінде Бейжің қаласына қыркүйек айындағы сапары бар. Қоғамда белсенділік танытқан жеткіншекке барлау қызметі «мұрагерлікке дайындық жасап жүр» деп баға берген.

Ұлттық барлау қызметі қызды бақылауға алған. Бес жылда бір өтетін партия конгресіне Джу Әнің қатысуы да назарға алынбақ. Айта кетерлігі, саяси жиын барысында елдің сыртқы саясаты, әскери жоспары мен ядролық бағдарлама мәселелері талқыланады.

Сеулдік депутат Ли Сонг-Квэннің айтуынша, Джу Ә бұрын «дайындалып жатқан мұрагер» болса, қазір ресми түрде «мұрагер ретінде тағайындалды».

Джу Ә — Ким Чен Ын мен әйелі Ри Сол Жудың жалғыз танымал баласы. Ким Чен Ынның үлкен ұлы бар деген деректер болса да, ол ресми түрде расталмаған.

Алғаш рет мұрагер қыз туралы ақпарат 2013 жылы американдық баскетболшы Деннис Родман арқылы белгілі болған. Джу Ә алғаш рет мемлекеттік теледидарға 2022 жылы шыққан. Онда оның әкесінің қолын ұстап, Солтүстік Кореяның жаңа баллистикалық зымыранын қарап тұрған сәті көрсетілген.