Қазақстанның Еңбек және халықты әлеуметтік қорғау министрлігі Оңтүстік Корея аумағында заңсыз жұмыс істеп жүрген азаматтарға маңызды ескерту жасады. Ведомствоның мәліметінше, қазақстандықтар 2026 жылдың ақпан айының соңына дейін Корея Республикасынан ерікті түрде шыға алады. Бұл жағдайда айыппұл салынбайды әрі елге қайта кіруге тыйым қолданылмайды.

Министрліктің баспасөз қызметінің хабарлауынша, бұл мүмкіндік Қазақстан мен Кореяның құзырлы органдары арасындағы келіссөздер нәтижесінде жүзеге асқан. Атап айтқанда, заңсыз көші-қонды азайту және азаматтардың құқықтарын қорғау мәселелері бойынша Қазақстанның Еңбек министрлігі мен Корея Республикасының Әділет министрлігі ерікті түрде елден шығу бағдарламасының мерзімін уақытша кеңейтуге келіскен.

Бағдарлама заңсыз мәртебесін реттеуге ниетті азаматтарға құқықтық салдарды жеңілдетуді көздейді. Дегенмен бұл шара қылмыстық құқықбұзушылық жасаған, мәжбүрлеп елден шығарылуға жататын, сондай-ақ 2025 жылғы 1 желтоқсаннан кейін заңсыз мәртебеге өткен шетелдіктерге қолданылмайды.

Ерікті түрде шығу үшін азаматтың жарамды төлқұжаты, елден өз еркімен кету туралы өтініші және әуе билеті болуы қажет. Алдын ала хабарлама ұшу күніне дейін 15 пен 3 күн аралығында Корея Республикасының иммиграциялық кеңселері арқылы беріледі.

Министрлік қазақстандықтарды шетелде тек заңды негізде жұмыс істеуге шақырды. Ведомствоның айтуынша, бұл заңсыз көші-қон, депортация, айыппұл, түрлі құқықтық шектеулер мен еңбек қанауы сияқты қауіптердің алдын алады.

Сонымен қатар, еңбек министрлігі азаматтарға тек ресми әрі тексерілген арналарға жүгінуге кеңес береді. Олардың қатарына лицензиясы бар жеке жұмыспен қамту агенттіктері, мемлекеттік бағдарламалар және жұмыс берушілердің ресми ұсыныстары кіреді. Ведомство шетелде еңбек етіп жүрген Қазақстан азаматтарының құқықтарын қорғау жұмыстары жалғаса беретінін мәлімдеді.