Сеул соты Оңтүстік Кореяның бұрынғы бірінші ханымы Ким Кон Хиді іскерлік келіссөздер барысында шіркеу ұйымынан қымбат сыйлықтар алғаны үшін кінәлі деп танып, оған 1 жыл 8 айға бас бостандығынан айыру жазасын тағайындады.

Сот мәліметінше, 2022 жылдың шілдесінде Ким Біріккен шіркеу өкілінен Chanel сөмкесін және Graff брендінің қымбат алқасын алған. Сот мұны қызметтік ықпалды жеке пайдасына пайдалану деп бағалаған. Айыпталушы сыйлықтарды пара ретінде алғанын мойындамаған.

Сонымен қатар, Кимге акция бағаларын манипуляциялау, саяси қорлар туралы заңды бұзу, сондай-ақ 2022 жылғы президент сайлауы алдында тегін сауалнамалар алу бойынша айыптар тағылған. Алайда сот оны акцияларға қатысты кейбір айыптаулардан ақтаған.

Yonhap агенттігінің хабарлауынша, тамыз айынан бері Ким қамауда отыр және барлық айыптарды жоққа шығарады. Оның адвокаттары үкімді тым қатаң деп бағалап, апелляция беруді қарастырып отыр.

Айта кетейік, 16 қаңтарда Оңтүстік Кореяның бұрынғы президенті Юн Сок Ёль бес жылға бас бостандығынан айырылған еді.