Биылғы «Алтын глобус» марапатын табыстау рәсімінде Голливуд актерлері АҚШ-тың иммиграция және кеден қызметінің (ICE) іс-қимылына қатысты өз ұстанымдарын білдірді. Қызыл кілемде Марк Руффало бастаған бірқатар өнер майталмандары төстеріне «Be Good» («Адамгершілік таныт, әділ бол) және «ICE OUT» («ICE қызметі кетсін») жазуы бар белгішелер тағып шықты. Бұл акция Миннеаполис пен Портленд қалаларында федералдық агенттердің қатысуымен болған атыс оқиғаларынан кейін ұйымдастырылды.

Миннеаполисте орын алған оқиға кезінде 37 жастағы Рене Николь Гуд ICE қызметкерінің оғынан қаза тапқан болатын. Оқиғаның бейнежазбаларына сәйкес, офицер жол жиегінде тұрған көлікке жақындап, жүргізушіге сыртқа шығуды бұйырған, кейіннен қару қолданған. Марқұм Рене Гуд үш баланың анасы және өзін шығармашылық сала өкілі ретінде танытқан азамат еді. Осы оқиғадан кейін Портлендте де ұқсас жағдай тіркеліп, Шекара қызметінің (CBP) агенттері күдікті көлікті тоқтату барысында екі адамды жаралады. Қазіргі таңда бұл істер бойынша ФБР тергеу амалдарын жүргізіп жатыр.

Аталған оқиғалар АҚШ-тың бірнеше ірі қаласында наразылық шерулеріне ұласты. Портленд мэрі Кит Уилсон федералдық биліктің әрекетіне күмән келтіріп, тиісті қызметтерді қала аумағынан кетуге шақырды. «Working Families Power» ұйымының өкілі Нелини Стамптың айтуынша, бұл акция қоғам назарын иммиграциялық саясат пен күштік құрылымдардың іс-қимылына аударуды көздейді. Голливуд жұлдыздарының бұл қадамы елдегі саяси және әлеуметтік пікірталастардың өнер ортасына да әсер еткенін көрсетті.