Мемлекет басшысы Қасым-Жомарт Тоқаев Алатау қаласын дамыту жөніндегі кеңесте өңірдің әлеуметтік-экономикалық көрсеткіштері мен болашақ даму бағыттарына тоқталды, -деп хабарлайды «Dalamedia» ақпараттық порталы.

Президенттің айтуынша, Алатау қаласын дамытуға қатысты негізгі қағидалар жаңа Конституцияда көрініс тапқан. Осыған байланысты Алатауды бірегей құқықтық мәртебесі бар қарқынды дамып келе жатқан қала ретінде атауға болатынын айтты.

Кеңесте өңір экономикасының негізгі көрсеткіштері де жария етілді. Жыл басынан бері облысқа 266,2 миллиард теңге инвестиция тартылған. Өнеркәсіп саласындағы өндіріс көлемі шамамен 900 миллиард теңгеге жеткен.

Сондай-ақ биылғы алғашқы төрт айдың қорытындысы бойынша ауыл, орман және балық шаруашылығы салаларындағы нақты көлем индексі 101,2 пайыз болғаны айтылды.

Мемлекет басшысы өткен жылы өңірлік жалпы өнім көлемі 6,7 триллион теңгені құрап, 5,4 пайызға артқанын жеткізді. Ал қаңтар-сәуір айларындағы қысқа мерзімді экономикалық көрсеткіштер бойынша аймақ елімізде бесінші орында тұр.

Президенттің сөзінше, Alatau City болашақта үлкен деректер, озық технологиялар және «ақылды» басқару жүйелері негізінде дамитын заманауи шаһарға айналады. Қала инфрақұрылымы, сервистері мен экономикасы өзара тығыз байланысқан, толық цифрлық форматта жұмыс істейтін алғашқы қалалардың бірі болмақ.