Ерекше мәртебе берілген Алатау қаласына қарасты аумақта тұратын 70-тен астам отбасы жалғыз баспанасынан айырылып қалуы мүмкін. Себебі тұрғындар 10 жыл бұрын сатып алған жер телімдерінің құжаттары жалған болып шыққан, ,-деп хабарлайды «Dalamedia» ақпараттық порталы.

Алатау қаласына қарасты Дәулет ауылының тұрғындары он жылдан бері үйлерінің құжаттарын толық рәсімдей алмай келеді. Соның салдарынан елді мекенде жол, жарық, газ мәселесі әлі күнге дейін шешілмеген. Тіпті кейбір тұрғындардың тұрақты тіркеуі де жоқ.

Тұрғындардың айтуынша, құжат мәселесі салдарынан балаларын мектепке орналастыру, емхана қызметін пайдалану да қиынға соғып отыр.

«Үйдің құжатын ала алмай жүргеніме 10 жыл болды. Балаларым тіркеусіз жүр. Газ жоқ, су жоқ. Бармаған жеріміз қалмады. Әкімдікке де талай айттық, бірақ нақты нәтиже жоқ», – дейді тұрғын Наурызхан Қалаш.

Ал ауыл тұрғыны Мадина Байдолла жер құжаттарының заңсыз екенін екі жыл бұрын ғана білгенін айтады. Оның сөзінше, үй салуға 15-20 миллион теңге жұмсалған. Енді үй сүрілсе, отбасының барар жері болмайды.

«Бұл үйге қомақты қаржы кетті. Егер тартып алса, балаларыммен қайда барамын? Екі балам бар, үшінші балама аяғым ауыр. Тіркеу болмағандықтан, емханаға да бара алмаймыз», – дейді ол.

Тұрғындар қолдарында түпнұсқа мөрі бар құжаттар болғанын алға тартады. Алайда кейін олардың заңды күші жоқ болып шыққан.

«Бізге барлық құжат мөрімен берілді. Бірнеше жыл бойы мерзімін ұзартып жүрдік. Қазір ондаған отбасы жалған құжатпен жүргенімізді біліп отырмыз», – дейді тұрғын Әсел Қасымбекова.

Ал жергілікті әкімдік мәселені сот арқылы ғана шешуге болатынын айтады. Шенеуніктердің сөзінше, кей тұрғындар құжат рәсімдеу ісін соңына дейін жеткізбеген.

«Кейбір тұрғындар құжат рәсімдеуді бастап, бірақ толық тіркетпеген. Бірінің жалға алу мерзімі өтіп кеткен, енді бірі мемлекеттік акт алмаған. Қазір біздің берер кеңесіміз – мәселені сот арқылы заңдастыру. Егер арнайы комиссия құрылып, оң шешім қабылданса, жағдай өзгеруі мүмкін», – деді Алатау қалалық сәулет және қала құрылысы бөлімінің басшысы Нұрдос Сылдырбаев.