Алматы облысында 74 жастағы зейнеткер алаяқтардың арбауына түсіп, өмір бойы тұрған жалғыз баспанасынан айырылды, — деп хабарлайды «Dalamedia» ақпараттық порталы.

Тамара Шинге өзін полиция және Ұлттық банк қызметкерлері ретінде таныстырған белгісіз адамдар хабарласып, «арнайы операцияға» қатысып жатқанын айтып сендірген. Олар әйелге үйін нарықтан төмен бағаға сатуды ұсынып, бұл арқылы алаяқтарды ұстауға көмектесесіз деп иландырған. Сонымен қатар ешкімге тіс жармауды талап етіп, қорқыту тәсілдерін де қолданған.

Зейнеткердің айтуынша, үйді сату туралы хабарландыруды да қаскөйлер өздері жариялап, келесі күні-ақ сатып алушыны алып келген. Оны «өз адамымыз» деп таныстырып, ұсынылған бағаға бірден келісуге көндірген. Нәтижесінде баспана небәрі екі күнде 7,5 миллион теңгеге рәсімделген.

Мәміле кезінде әйел асығыс болған. Ол марқұм әпкесін жерлеуге кетуі керек болып, сенімхатты көршісіне қалдырған. Ал көршісі ақшаны курьерге табыстаған. Кейін белгілі болғандай, көршінің өзі де осыған ұқсас алаяқтықтың құрбаны болған.

Жәбірленушілер полицияға арыз түсіргенімен, сотта зейнеткердің алаяқтардың ықпалына түскені дәлелденбеді. Екі бірдей сот шешімі де жаңа үй иесінің пайдасына шыққан.

Қазір адвокаттар кассациялық шағым дайындап жатыр. Сонымен қатар мәселені өзара келісім арқылы шешу мүмкіндігі де қарастырылуда. Ал зейнеткер үйден көшу қаупінде қалып отыр және қайда барарын білмейді.