Есінен танып қалған қызға қол ұшын созамын деп, телефонын ұрлап кеткен. Оқиға алматы қаласында болды. Тіпті бойжеткеннің құрбысының да телефоны қолды болған. Достық, қабанбай батыр және зенков көшелері түйіскен жерде орын алған жайтты куәгерлер видеоға түсіріп, желіге жүктеген.

Куәгерлердің сөзінше, қыздардың бірінің денсаулығы күрт нашарлап, ол жерге құлап қалған. Құрбысы есін жиғызып, тұрғызуға талпынған кезде бейтаныс үш ер адам келген.

Азаматтар «көмек көрсетеміз» деген кейіп танытқан. Сол мезетте қыздардың қалтасынан екі қымбат смартфон — iphone 15 pro мен iphone 16 pro жоғалған. Бұл бейнежазбада таспаланып қалған. Бірақ күдіктілер оқиға орнынан із суытып үлгерген.

Көпшіліктің қызу талқысына түскен оқиғаға қатысты қалалық полиция өкілдері де пікір білдірді:

«ұрлық фактісі тіркелді. Күдікті болуы мүмкін тұлғалар анықталды, оларды ұстау бойынша шаралар қабылданып жатыр. Тергеу жан-жақты жүргізілуде», – деді ол.

Полиция қызметкерлері азаматтарды қоғамдық орындарда жеке заттарына мұқият болуға шақырды. Іс бойынша тергеу нәтижесіне қарай процессуалдық шешім қабылданады.