Ақтөбеде Шанхай ықшамауданында мектеп оқушысына қаңғыбас иттер шабуыл жасады. 13 жастағы жеткіншек шошып қалғанымен, қазір дәрігерлердің бақылауында,-деп хабарлайды «Dalamedia» ақпараттық порталы. Бұл туралы 31-арнаның «Информбюро» бағдарламасы мәлімдеді

Оқиға кезінде көшеде жүрген адамдар араша түсіп, баланы иттердің арасынан алып шыққан. Соның арқасында Темірлан ауыр жарақат алмаған. Алайда анасының айтуынша, оқиғадан кейін бала қатты қорқып қалған.

«Сол күні ауруханаға барып, қажетті вакциналарды алып қайттық. Әлі де балаларда қорқыныш бар. Далаға да, мектепке де жалғыз барғысы келмейді. “Мама, апарып таста” деп айтады. Ит баламды артынан тістеп алған. Дәрігерлер апта сайын төрт рет вакцина алу керек деді. Вакцина ауыр тиіп жатыр, қызуы да көтерілді», – дейді Ақтөбе қаласының тұрғыны Салтанат Боранқұлова.

Тұрғындардың айтуынша, ауданда қаңғыбас иттер көбейіп кеткен. Олар көбіне қоқыс жәшіктерінің маңында жүреді және адамдарға жиі шабуылдайды. Сондықтан ата-аналар балалардың қауіпсіздігіне алаңдап отыр.

«Баламды мектепке апарғанда иттер соңымыздан қалмайды. Балалар қоқыс төгуге де қорқады. Иттер өте көп. Дүкенге барудың өзі қиын. Қайда қарасаң да ит. Осы мәселені шешсе жақсы болар еді. Иттер көбейіп жатыр», – дейді қала тұрғыны Алмагүл Асанғалиева.

Қала әкімдігінің мәліметінше, биыл «Жануарларға жауапкершілікпен қарау туралы» заңға өзгеріс енгізілген. Соған сәйкес қаңғыбас иттерді аулау міндеті ветеринария басқармасынан алынып, ауыл шаруашылығы бөліміне берілген.

Ақтөбе қалалық ауыл шаруашылығы бөлімінің басшысы Мұрат Тоқболатовтың айтуынша, қазір бұл жұмыспен жеке кәсіпкер айналысады. Осы мақсатта сегіз бригада құрылған. Мамандар иттерді арнайы дәрі арқылы ұстап, панажайға жеткізеді. Ауру немесе аса агрессивті иттер жойылады, ал қалғандарына стерилизация немесе кастрация жасалып, құлағына чип салынады.

Биыл бұл мақсатқа 55 миллион теңге бөлінген. Жыл басынан бері қалада шамамен 1500-ге жуық қаңғыбас ит ауланған.