Маңғыстауда жағалауда аққулар мен басқа да құстардың өлекселері табылды. Өлген құстар Ақтау қаласы мен Сайын Шапағатов аумағынан анықталып, мамандар 20 аққудың өлексесін жинап, жойды. Ал судан алынған сынамаларда ластаушы заттар анықталған жоқ – деп хабарлайды «Dalamedia» STAN.kz сілтеме жасап.

Құзырлы инспекция аймақта аққулардың жаппай қырылмағанын, бұл миграция кезіндегі табиғи жағдай екенін атап өтті. Дегенмен, тұрғындарға жағалаудағы аққуларды нанмен тамақтандыруға болмайтыны ескертілді.

Облыстық Орман шаруашылығы және жануарлар дүниесі аумақтық инспекциясының басшысы Ғаббас Досатовтың айтуынша, аққуларды қолдан, әсіресе нанмен қоректендірудің қажеті жоқ. Көп мөлшерде нан жеген аққулардың денсаулығына зиян келіп, миграция кезінде оларға қиындық туғызуы мүмкін.