Маңғыстау облысының экология департаменті Түпқараған ауданының жағалауында 112 өлі каспий итбалығы табылғанын хабарлады. Бұл мәлімет департаменттің баспасөз қызметі арқылы таратылды.
«Маңғыстау облысы бойынша балық инспекциясы басқармасымен бірлесіп жүргізілген мониторинг барысында Түпқараған ауданының жағалау сызығында Асан елді мекенінен Баутино мүйісіне дейінгі аралықта 112 итбалық өлексесі анықталды», делінген хабарламада.
Нақтырақ айтқанда, Асан ауылынан Форт-Шевченко жағажайына дейінгі аумақта 39, ал Форт-Шевченко жағажайынан Баутино мүйісіне дейін 73 итбалықтың өлексесі табылған.
3 қараша күні тұрғындардан Баутино жағалауында өлі итбалықтардың табылғаны туралы хабар түскен соң, экология департаментінің зертханалық-талдау бақылау бөлімінің мамандары теңіз суынан сынама алған.
«Аталған ақпарат 2025 жылғы 3 қарашада №254752030001133 нөмірімен 112 қызметіне тіркеліп, белгіленген хабарлау алгоритмі бойынша жолданды», - деп мәлімдеді департамент.
Қазір мамандар Каспий теңізіндегі итбалықтардың жаппай қырылу себептерін анықтап жатыр.
DALAMEDIA admin
Бүгін, 19:01
Әлем