Мемлекет басшысы «Астана» халықаралық қаржы орталығының басқарушысы Ренат Бектұровпен кездесті. Кездесу барысында орталықтың 2025 жылғы жұмыс қорытындылары және 2026 жылдың алғашқы тоқсанындағы негізгі көрсеткіштері, сондай-ақ алдағы даму жоспары талқыланды, -деп хабарлайды «Dalamedia» ақпараттық порталы.

Ренат Бектұровтың айтуынша, АХҚО құрылған уақыттан бері тартылған инвестиция көлемі 21,5 миллиард долларға жеткен. Оның ішінде 2025 жылдан бері 7,2 миллиард доллар инвестиция тартылған.

Сонымен қатар орталықтың басқаруындағы активтердің жалпы көлемі 5,4 миллиард долларды құрады.

Оның дерегінше, АХҚО қатысушылары ел бюджетіне жалпы 284,3 миллиард теңге салық төлеген. Тек 2025 жылдың өзінде бұл көрсеткіш 135,9 миллиард теңгеге жеткен. Бұл өсім қатысушылар санының артуымен және олардың белсенді қызметімен байланысты.

Кездесу барысында АХҚО құрылымдары атқарған жұмыстар да баяндалды. Айталық, AIX биржасы іске қосылған сәттен бері борыштық және үлестік капитал көлемі 12,4 миллиард долларға дейін ұлғайған. Ал 2023–2025 жылдар аралығындағы сауда-саттық көлемі 4 миллиард долларды құраған.