Ел қазынасының 98 пайызы салықтан құралады. Бұл туралы Үкіметтің Telegram-дағы арнасы жазды, — деп хабарлайды «Dalamedia» ақпараттық порталы.

Жарияланған мәліметтерге сүйенсек, бюджет кірісі едәуір артып, жоспарланған мөлшерден асқан. 4 трлн теңге түсімі көзделгенімен, нақты түсім 4,2 трлн теңгеге жеткен. Осылайша, жоспар 101,8 пайызға орындалды.

Сандарға сүйенсек:

• Корпоративтік табыс салығы — 16,9 пайызға;

• Импортқа салынатын қосылған құн салығы — 24,2 пайызға;

• Пайдалы қазбаларды өндіру салығы — 35,7 пайызға өскен.

Өткен жылмен салыстырғанда мемлекеттік бюджеттің кірісі 930,6 млрд теңгеге көбейіп, өсім 16,9 пайызды құраған. Ал биыл салық есебінен республикалық бюджетті 18,886 трлн теңгеге толықтыру көзделуде. Бұл 2025 жылғы нақты көрсеткіштен 4,4 трлн теңгеге артық.

Бұл мәліметтерге 2025 жылдың төртінші тоқсаны бойынша төленген қосылған құн салығы да (ҚҚС) қосылған. Төлем мерзімі 2026 жылдың 25 ақпанына дейін белгіленген еді. Осыған сәйкес, ҚҚС міндеттемелері 12 пайыздық мөлшерлемемен есептелген.

Мамандардың айтуынша, өсімге экспорттағы қолайлы баға, өнім өткізу көлемінің ұлғаюы және салық пен кеден саласындағы бақылаудың күшеюі әсер еткен. Сондай-ақ жыл басынан бері арнайы салық режимі аясында 392 мың адам өзін-өзі жұмыспен қамтыған. Ал қосылған құн салығын төлейтін субъектілер саны 10 мыңға артқан.