Мемлекет басшысы Қасым-Жомарт Тоқаев Павлодар облысының әкімі Асайын Байхановты қабылдап, өңірдің әлеуметтік-экономикалық дамуы мен бірқатар ірі жобалардың орындалу барысын талқылады. Кездесу барысында Екібастұз қаласында жаңа әуежай салу мәселесін жан-жақты зерделеу тапсырылды, — деп хабарлайды «Dalamedia» ақпараттық порталы.

Әкімнің айтуынша, өткен жылы да, 2026 жылдың алғашқы тоқсанында да облыс экономикасында оң динамика сақталған. Өңірге 1,3 триллион теңгеге жуық инвестиция тартылып, бұл көрсеткіш 47 пайызға өскен. Павлодар облысы инвестиция көлемі бойынша елдегі алдыңғы өңірлердің қатарында тұр. Өнеркәсіп өндірісінің көлемі 4,1 триллион теңгеге жетіп, аймақтың өндірістік әлеуеті айқын көрінген. Сонымен қатар еліміздегі көмір мен ферроқорытпаның 58 пайызы, электр энергиясының 42 пайызы осы өңірде өндірілетіні айтылды.

Ауыл шаруашылығы саласында да өсім бар. Жалпы өнім көлемі 9,6 пайызға артып, 571,4 миллиард теңгеге жеткен. Су үнемдеу технологияларын енгізу нәтижесінде шаруалар жоғары өнім жинап, картоп, күнбағыс және қарақұмық түсімі артқан.

Әлеуметтік салада 30 мыңнан астам жаңа жұмыс орны ашылған. Бірқатар білім және медицина нысандары пайдалануға берілді: қалаларда 2 мектеп, ауылдарда 3 мектеп, сондай-ақ 30 денсаулық сақтау мекемесі салынған. Биыл тағы 2 мектеп пен 5 ірі әлеуметтік жоба іске асыру жоспарланған. Бұған қоса, барлық ауылдардың таза ауыз суға қол жеткізгені хабарланды.

Инфрақұрылым бағытында да бірқатар жұмыс атқарылған. Қоғамдық көлік паркі үш қалада толық жаңартылған. Жақсы жағдайдағы жолдардың үлесі 96 пайызға жетіп, 621 шақырым жол мен ауылішілік көшелер жөнделген. Алдағы уақытта перспективті ауылдардың кіреберіс жолдарын асфальттау көзделіп отыр.

Кездесуде өңірде атқарылып жатқан ірі жобалар да сөз болды. Олардың қатарында Ертіс арқылы жаңа көпір салу, әуежайдың ұшу-қону жолағын жаңарту, «Шахтер» саябағын қайта жаңғырту, трамвай паркін жаңарту, үшінші ГРЭС салу және деректерді өңдеу орталықтарын іске асыру бар.

Президент Екібастұздың көлік-логистикалық әлеуетін арттыруға ерекше тоқталып, қалада жаңа әуежай салу мүмкіндігін мұқият қарастыруды тапсырды. Оның айтуынша, мұндай жоба өңірдің транзиттік мүмкіндігін күшейтіп, инвестициялық тартымдылығын арттыра түспек.