Кезекті Үкімет отырысында көмір қорын тиімді пайдалану және дамыту мәселесі қаралды, — деп хабарлайды «Dalamedia» ақпараттық порталы.

Премьер-министр Олжас Бектеновтің төрағалығымен өткен жиында көмір энергетикасын дамыту және көмір генерациясына қатысты ұлттық жобаны іске асыру барысы талқыланды. Басқосуда Энергетика министрі Ерлан Ақкенженов, «Самұрық-Энерго» компаниясының басшысы Қайрат Мақсұтов, сондай-ақ бірқатар өңір әкімі мен ірі көмір кәсіпорындарының өкілдері баяндама жасады.

Үкімет басшысы Мемлекет басшысының Ұлттық құрылтайда берген тапсырмасына тоқталып, көмірден электр энергиясын өндіруді дамыту елдің энергетикалық қауіпсіздігі үшін аса маңызды екенін атап өтті. Жаңа ұлттық жоба аясында алдағы бес жылда жаңа стансалар салынып, қолданыстағы 11 нысан жаңғыртылмақ. Соның нәтижесінде қосымша 8 гигаватт энергия қуатын алу жоспарланып отыр.

Жиында көмірдің әлем елдерінде, әсіресе энергияны көп қажет ететін өндірістер мен цифрлық инфрақұрылым үшін әлі де маңызды ресурс болып отырғаны айтылды. Сонымен қатар жиынға қатысушылар «таза көмір» технологияларының қарқынды дамып келе жатқанына назар аударды. Мұндай тәжірибе Қытай, АҚШ, Үндістан және Оңтүстік Корея сияқты елдерде кеңінен қолданылып отыр. Заманауи технологиялар көмірқышқыл газы мен басқа да зиянды заттарды 90 пайызға азайтып, қауіпсіздікті күшейтеді.

Премьер-министр қолданыстағы жылу электр станцияларын жаңғыртып, зиянды шығарындыларды азайту және олардың тиімділігін арттыру үшін осындай технологияларды кеңінен енгізу қажет екенін айтты. Сонымен қатар энергия тұтынудың артуы мен цифрлық саланың дамуын ескере отырып, жаңа нысандарды уақытылы іске қосу маңызды екеніне тоқталды. Осыған байланысты ол Энергетика министрлігіне «Самұрық-Энерго» компаниясымен және өңір әкімдіктерімен бірлесіп, ұлттық жобаның орындалуын қатаң бақылауға алуды тапсырды.

Жиында Алматыдағы ЖЭО-2 және ЖЭО-3 нысандарын жаңғырту мәселесі де қозғалды. Үкімет басшысы жобалардың мерзімінде аяқталуын талап етіп, бақылауды күшейтуді тапсырды. Бұл бағыттағы жұмыстарды тексеру Премьер-министрдің бірінші орынбасары Роман Склярға жүктелді.

Сонымен қатар бірқатар нақты тапсырма берілді. Энергетика және Экология министрліктері бір ай ішінде елдегі барлық энергия көзіне талдау жасап, «таза көмір» технологияларын енгізу бойынша жол картасын әзірлеуі тиіс. Көмір станцияларында заманауи тазарту жүйелерін кезең-кезеңімен енгізу, халықаралық тәжірибені бейімдеу бойынша зерттеулерді күшейту де міндеттелді.

Үкімет көмір химиясы саласын дамытуға да басымдық беріп отыр. Бұл бағытта қосылған құны жоғары өнім өндіру арқылы экономиканы әртараптандыру және экспорттық әлеуетті арттыру көзделген. Энергетика министрлігіне 1 шілдеге дейін осы саланы қолдаудың нақты тетіктерін әзірлеу тапсырылды.

Бұдан бөлек, көмір өндіруде цифрлық технологияларды енгізу арқылы өндіріс тиімділігін арттыру және жұмысшылардың қауіпсіздігін қамтамасыз ету мәселесі де назардан тыс қалмады. Қазіргі таңда көмірді ашық тәсілмен өндіруде ескірген жабдықтар қолданылып келетіні айтылып, бұл жағдайды өзгерту қажеттігі көтерілді.

Жалпы, Үкімет көмір саласын кешенді түрде жаңғыртып, елдің энергетикалық тұрақтылығын күшейтуді көздеп отыр.