Үкіметтің мәліметінше, премьер-министр Олжас Бектенов қол қойған құжат елдің 2030 жылға дейінгі энергетикалық қауіпсіздігін қамтамасыз етуге бағытталған. Сонымен қатар, индустрия мен цифрлық экономиканың дамуына қажет базалық қуат тапшылығын жою көзделіп отыр.

Жоба шеңберінде жалпы қуаты 7,8 ГВт болатын нысандарды іске қосу және жаңғырту жоспарланған. Атап айтқанда, Екібастұз, Курчатов және Жезқазғанда ірі энергия көздері салынады. Бұдан бөлек, Көкшетау, Семей және Өскеменде жаңа жылу электр орталықтары бой көтермек.

Қолданыстағы стансалар да назардан тыс қалмайды. Ақсу ГРЭС, Екібастұз ГРЭС-2 және Қарағанды энергия торабы секілді 11 нысан терең жаңғыртудан өтеді. Соның нәтижесінде саладағы жабдықтардың тозу деңгейін 2030 жылға дейін айтарлықтай төмендету көзделіп отыр.

Жобаларды жүзеге асыруға бюджеттен тыс қаражат тартылмақ. Жалпы инвестиция көлемі 7,5 трлн теңгеден асады. Сонымен бірге, экология мәселесіне басымдық беріліп, жаңа нысандар тек заманауи әрі экологиялық технологиялармен салынбақ.

Әлеуметтік бағыттағы шаралар да қарастырылған. Атап айтқанда, шамамен 4,5 мың тұрақты жұмыс орны ашылады. Сондай-ақ «Отбасы банкімен» бірлесіп көмір электр стансаларының қызметкерлеріне арналған жеңілдетілген ипотека бағдарламасы іске қосылады.

Бұдан бөлек, сала мамандарының біліктілігін арттыру үшін профильдік жоғары оқу орындары базасында жүйелі жұмыс жүргізіледі.

Жоба аясында энергетика жүйесінің тұрақты жұмысын қамтамасыз ету үшін көлік және өндіріс салаларымен үйлесімділік күшейтіледі. 2030 жылға қарай көмірге деген сұраныс жылына қосымша 20 млн тоннаға дейін өседі деп күтілуде. Осыған байланысты вагон паркін кеңейту, теміржол инфрақұрылымын жаңарту және отын тасымалына арналған тарифтік тетіктер енгізу жоспарланып отыр.