Жамбыл облысының Мойынқұм ауданында қуаты 1 гигаватт болатын ірі жел электр станциясының іргетасы қаланды. Капсула салу рәсіміне өңір әкімі Ербол Қарашөкеев қатысып, жоба ресми басталды — деп хабарлайды «Dalamedia» ақпараттық порталы.

Салтанатты жиында «Самұрық-Қазына» қорының басқарма төрағасы Нұрлан Жақыпов пен Францияның Қазақстандағы Төтенше және Өкілетті Елшісі Сильван Гиоге сөз сөйледі. Ал TotalEnergies компаниясының жаңартылатын энергия бағыты бойынша вице-президенті Оливье Жуни бейнебайланыс арқылы шараға қатысып, өз құттықтауын жеткізді.

Аймақ басшысы бұл бастама өңір экономикасына тың серпін беріп, елдегі энергетика саласының дамуына ықпал ететінін атап өтті. Оның айтуынша, Мойынқұмның табиғи мүмкіндігі жоғары, енді ол Қазақстанның энергетикалық картасында маңызды орын алмақ.

Жобаны «Ақтас Энерджи» серіктестігі жүзеге асырып жатыр. Жалпы құны 620 миллиард теңгені құрайды. Сонымен қатар қуаты 300 мегаватт болатын энергия сақтау жүйесі қарастырылған. Жобаға француздық TotalEnergies, «ҚазМұнайГаз» және Samruk-Energy компаниялары серіктес ретінде қатысуда.

Жел электр станциясы толық іске қосылған кезде жылына шамамен 4 миллиард киловатт-сағат электр энергиясын өндіреді деп күтіледі. Бұл өз кезегінде көмірқышқыл газының көлемін 3,2 миллион тоннаға дейін азайтуға мүмкіндік береді.

Құрылыс кезінде екі мыңға жуық адам жұмыспен қамтылса, нысан пайдалануға берілген соң 200 тұрақты жұмыс орны ашылады. Жобаны толық аяқтау 2028 жылдың соңына жоспарланып отыр.

Зерттеу жұмыстары жүргізілетін аумақ шамамен 30 мың гектарды қамтиды.

Айта кетейік, Жамбыл облысы жаңартылатын энергия көздерін игеру бойынша ел ішінде алдыңғы қатарда. Қазір өңірде жалпы қуаты 571,3 мегаватт болатын 22 нысан жұмыс істеп тұр. Оның ішінде алты су, он жел және алты күн электр станциясы бар.

Өткен жылы облыста 5,8 миллиард киловатт-сағат электр энергиясы өндірілсе, соның 1,4 миллиарды жаңартылатын көздерге тиесілі. Ал 2028 жылға қарай бұл көрсеткіш 2,5 гигаваттқа жетіп, нысандар саны 24-ке дейін ұлғаюы жоспарланған.