Елімізде 2030 жылдың соңына дейін жалпы қуаты шамамен 660 мегаватт болатын жаңа су электр станциялары іске қосылмақ, — деп хабарлайды «Dalamedia» ақпараттық порталы. Бұл туралы ҚР Энергетика министрлігінің баспасөз қызметі мәлімдеді.

Бүгінде елімізде жалпы қуаты 313 мегаватт болатын 43 су электр станциясы жұмыс істейді. 2025 жылы Жетісу облысында қуаты 26 мегаватт болатын «Корин СЭС-2» станциясы пайдалануға берілген.

Өткен жылдың қорытындысында жаңартылатын энергия көздері арқылы 8,621 млрд кВт/сағ электр энергиясы өндірілген. Соның 1,196 млрд кВт/сағ көлемін шағын және орта су электр станциялары өндірді.

Энергетика министрлігі аукцион тәсілі арқылы инвестиция тартпақ. 2025 жылы гидроэнергетика жобаларына 500 мегаватт қуат аукционға шығарылған.

Қазіргі таңда су электр станциялары негізінен елдің оңтүстік және шығыс өңірлерінде шоғырланған. Бұл бағытта Жамбыл, Алматы және Жетісу облыстары көш басында.

Жаңа жобалар іске асса, елдің энергия теңгерімі әртараптанып, шалғай аймақтарды тұрақты әрі экологиялық таза электр қуатымен қамтуға мүмкіндік пайда болмақ.