Аталмыш шешім Ұлттық құрылтайдың V отырысында Мемлекет басшысы Қасым-Жомарт Тоқаев жүктеген тапсырмаларды іске асыру мақсатында қолға алынған. Тиісті құжатқа Үкімет басшысы Олжас Бектенов қол қойған.

Жоба 2030 жылға дейін елдің энергетикалық тұрақтылығын қамтамасыз етуге бағытталған. Өндіріс пен цифрлық саланың дамуына байланысты электр қуатына сұраныс артып отыр. Жасанды интеллект жүйелерінің дамуы қосымша қуат көздерін қажет етеді. Ал баламалы энергия көздері мұндай сұранысты толық қамтамасыз ете алмайды.

Осыған байланысты алдағы жылдары 7,8 ГВт қуатты іске қосу және жаңғырту көзделген. Екібастұз, Курчатов және Жезқазған қалаларында ірі стансалар салу жоспарланып отыр. Сондай-ақ Көкшетау, Семей және Өскеменде жаңа жылу электр орталықтары іске қосылады.

Қолданыстағы нысандар да кезең-кезеңімен жаңғыртудан өтеді. Атап айтқанда, Ақсу ГРЭС, Екібастұз ГРЭС-2 және Қарағанды энергия торабы бар. Бұл шаралар жабдықтардың тозуын азайтып, жүйенің сенімділігін арттыруға мүмкіндік береді.

Жобаны жүзеге асыру үшін бюджеттен тыс қаражат тартылады. Жалпы инвестиция көлемі 7,5 трлн теңгеден асады.

Құжатта экология мәселесіне де ерекше мән берілген. Жаңа нысандар заманауи технологиялармен жабдықталып, зиянды қалдықтарды азайту көзделіп отыр. Бұл халықаралық талаптарға сай өндіріс қалыптастыруға жол ашады.

Жоба аясында жаңа жұмыс орындары ашылып, сала мамандарына қолдау көрсетіледі. Оның ішінде жеңілдетілген ипотека мен біліктілікті арттыру шаралары қарастырылған.

Жалпы, бұл бастама елдің энергетикалық тәуелсіздігін күшейтіп, өнеркәсіп пен көлік салаларының дамуына серпін береді.