Алдағы уақытта елімізде 11 мың шақырым жол жаңарып, әуежайлар 40 млн жолаушыға дейін қабылдай алады. Бұл туралы Премьер-министр Олжас Бектенов Үкіметтің кеңейтілген отырысында баяндады. Айта кетейік, жиын Президент Қасым-Жомарт Тоқаевтың төрағалығымен өтуде.

Басқосу барысында Олжас Бектенов көлік-логистика инфрақұрылымын дамыту және елдің транзиттік әлеуетін арттыру бойынша қабылданып жатқан шаралар туралы баяндады. Үкімет басшысының сөзінше, биыл елімізде жалпы ұзындығы 475 шақырым теміржол желісі салынып, 2,9 мың шақырым жол жаңғыртылмақ. Осылайша транзиттік тасымал көлемін 60%-ға арттырып, пойыздардың жылдамдығын сағатына 50 шақырымға дейін жеткізу көзделуде. Мәселен, Қытай шекарасынан Каспийге дейінгі жүк тасымалдау уақыты 84 сағаттан 55 сағатқа қысқарады.

Олжас Бектеновтің айтуынша, алдағы уақытта 11 мың шақырымды құрайтын автомобиль жолдарын салу және қайта жаңғырту жұмыстары жоспарлануда. Премьер-министр теміржол инфрақұрылымының тозуы еліміздің транзиттік әлеуетінің дамуына кедергі келтіретінін де тілге тиек етті. Сондықтан да Үкімет магистральдық желілерді жаңғыртуға арналған кешенді бағдарламаның іске асуын бақылауда ұстайды.

Алдағы уақытта Астана әуежайында екінші ұшу жолағының құрылысы басталмақ. Бұл өз кезегінде авиация саласының дамуына серпін бермек. Осылайша бірінші жолақты жаңғыртуға, ал әуежайдың өткізу қабілетін 4 есе арттырып, жолаушылар санын 40 млн-ға дейін жеткізуге сеп болмақ.

Айта кетерлігі, Президент тапсырмасы аясында авиаотынның нарықтағы бағасы $1,2 мыңнан $950-ға дейін төмендеген