Мемлекет басшысы Қасым-Жомарт Тоқаев премьер-министрдің бірінші орынбасары Нұрлыбек Нәлібаевты қабылдады. Кездесу барысында ол өнеркәсіпті дамыту мен ірі инфрақұрылымдық жобаларды іске асыру барысы жөнінде есеп берді ,-деп хабарлайды «Dalamedia» ақпараттық порталы.

Басқосуда өңдеу өнеркәсібінде атқарылып жатқан негізгі жұмыстар туралы мәлімет ұсынылды. Сонымен қатар Нұрлыбек Нәлібаев қосылған құны жоғары өнім өндірісін арттыру және энергетикалық инфрақұрылымды жаңғырту бағытындағы жоспарларға тоқталды.

Сондай-ақ, көлік-логистика жүйесін жетілдіру мен құрылыс саласын дамыту мәселелері де сөз болды.

Кездесу соңында Президент Қасым-Жомарт Тоқаев инфрақұрылымдық жобалардың сапалы жүзеге асырылуын қамтамасыз етуді, отандық тауар өндірушілерге қолдауды күшейтуді және алдағы жылу беру маусымына дайындық жұмыстарын қатаң бақылауда ұстауды тапсырды.

Айта кетейік, Мемлекет басшысының Жарлығымен 6 мамыр күні Нұрлыбек Машбекұлы Нәлібаев Қазақстан Республикасы Премьер-министрінің бірінші орынбасары болып тағайындалып, бұрынғы атқарған қызметінен босатылған болатын.