Қазақстан Премьер-министрінің орынбасары – мәдениет және ақпарат министрі Аида Балаева Жетісу облысына жұмыс сапарымен барып, Алакөл жағалауының жазғы туристік маусымға дайындығын тексерді. Сонымен қатар туризм және спорт министрі Ербол Мырзабосыновпен бірге өңірдегі туристік инфрақұрылым нысандарын аралап шықты, -деп хабарлайды «Dalamedia» ақпараттық порталы.

Сапар барысында Үшарал әуежайы, Көктұма ауылындағы жағалауды бекіту жұмыстары, кәріз-тазарту нысандары мен қонақүй кешендерінің қазіргі жағдайы қаралды. Әр бағыт бойынша жауапты мамандар атқарылып жатқан жұмыстар мен жобалардың жүзеге асу барысын баяндады.

Облыс әкімдігі жағалауды жазғы маусымға дайындау жұмыстарын жүйелі түрде жүргізіп келеді. Соңғы жылдары өңірдегі көлік инфрақұрылымы айтарлықтай жақсарған. Атап айтқанда, Талдықорған – Үшарал және Үшарал – Достық бағытындағы жолдар жаңартылып, қатынас жеңілдеген. Ал Үшарал әуежайының ұшу-қону жолағы жаңғыртылып, ірі ұшақтарды қабылдауға мүмкіндік жасалған.

Инженерлік инфрақұрылым да біршама күшейтілген. Электр желілері тартылып, қосалқы стансалар іске қосылған. Ақши ауылында кәріз жүйесінің құрылысы аяқталып, ағын суларды тазарту жобасы жалғасып жатыр. Бұл жұмыстар жағалаудағы санитариялық жағдайды жақсартуға және экологиялық қауіпсіздікті қамтамасыз етуге бағытталған.

Жағалауды бекіту мәселесі де назардан тыс қалған жоқ. Кейбір учаскелерде жағалаудың шайылу белгілері байқалған. Кәсіпкерлердің айтуынша, қыс мезгілінде мұз массалары жағажайға зиян келтіріп, жыл сайын қалпына келтіру жұмыстарын қажет етеді. Қазір Көктұма мен Ақши аумағында жағалауды нығайту жұмыстары жүргізілген, алайда бұл бағыттағы жұмыс әлі де жалғасуы тиіс.

Тазалық пен тәртіпке де ерекше мән берілген. Жағалауды күтіп ұстау үшін арнайы техника алынып, маусымдық жұмысшылар тартылған. Қоқысты дер кезінде шығару және демалыс орындарын таза ұстау бойынша нақты шаралар қолға алынған.

Қауіпсіздік мәселесі де басты назарда. Жаз мезгілінде қосымша құтқарушылар жұмысқа тартылады, жағалау бейнебақылау және дрон арқылы қадағаланады. Демалушыларға арналған ақпараттық ескертпелер орнату да жоспарланған.

Сапар барысында туристік саладағы еңбек қатынастары да сөз болды. Әсіресе жастар мен студенттердің бейресми жұмысқа тартылуына жол бермеу қажеттігі айтылды.