Мобильді байланыс операторларында абоненттердің келісімінсіз қосылатын ақылы қызметтер мен жасырын ақша шешу жағдайларына байланысты депутаттар тексеру жүргізуді талап етті, ,-деп хабарлайды «Dalamedia» ақпараттық порталы.

Бұл мәселені “Ақ жол” фракциясының депутаты көтеріп, премьер-министрдің орынбасары әрі жасанды интеллект және цифрлық даму министрі Жаслан Мәдиевке депутаттық сауал жолдады. Оның айтуынша, соңғы уақытта азаматтардан мобильді операторлардың ақылы сервистерді рұқсатсыз қосатынына қатысты шағымдар жиілеген.

Депутаттың дерегінше, Kcell және Activ абоненттері үшінші тараптың түрлі ақылы сервистеріне нақты келісім бермей-ақ жазылып қалған жағдайлар кездесіп отыр. Олардың қатарында Fun Online, My Games, “Марафон желаний”, Cinema Games, New Happy Bonus секілді қызметтер бар. Мұндай жазылымдар күн сайын балансынан қаражат шешіп отырғанымен, көп жағдайда тұтынушы оның себебін түсінбей жатады.

Сонымен бірге Beeline Kazakhstan компаниясының тариф саясатына да сын айтылды. Депутаттың сөзінше, егер абоненттің шотында толық төлемге жеткілікті қаражат болмаса, оператор қызметті тоқтатудың орнына пайдаланушыны автоматты түрде қымбат мегабайттық тарификацияға ауыстырады. Бұл ретте тұтынушы кей жағдайда хабарламаны байқамай қалып, интернетті басқа шарттармен пайдаланып кетеді.

Халық қалаулысы операторларды барлық ақылы қызмет пен есептен шығарылған қаражат туралы ақпаратты қосымша мен жеке кабинетте ашық көрсетуге міндеттеуді ұсынды. Сондай-ақ пайдаланушы қандай жазылым қосылғанын, оның құнын және оны қалай өшіруге болатынын бірден көріп отыруы қажет екенін атап өтті.

Бұдан бөлек, депутат пайдаланылмаған интернет-трафикті келесі айға көшіру мүмкіндігін қарастыруды, сондай-ақ абоненттің келісімінсіз қызмет қосуға және тарифті өзгертуге тыйым салу мәселесін заң жүзінде қарауды ұсынды.