Көшелер мен сауда орындарында көбейген ойын автоматтары қоғамда алаңдаушылық тудырып отыр, -деп хабарлайды «Dalamedia» ақпараттық порталы.

Сенатор Ғалиасқар Сарыбаевтың айтуынша, «хватай-ка» деп аталатын жұмсақ ойыншық ілетін құрылғылар әсіресе мектеп, спорт және дамыту орталықтарының маңында жиі кездеседі. Балалар ата-анасының берген ақшасын осы ойындарға жұмсап, шағым көбейген.

Депутат мұның соңы тек қаржылық шығынмен шектелмейтінін айтады. Оның сөзінше, мұндай ойындар балалар арасында жанжал туғызып, тіпті бір-бірін бопсалауға дейін апаруда. Ең бастысы — жеңісті оңай күту әдеті қалыптасып, тәуелділікке бейім мінез пайда болады.

Жасөспірім Ілияс Меделхан да бұл ойынға әуестеніп кеткенін айтады. Алғашында аз ақша салғанымен, кейін шығын көлемі артқан.

“Басында 100-200 теңгеден бастайсың. Кейін байқамай көп ақша жұмсап қоясың. Ұтылсаң да қайта ойнағың келеді. Аптасына 12-15 мың теңгеге дейін кететін кездер бар”, – дейді ол.

Психолог Жасұлан Сейтқалиевтің сөзінше, мұндай ойындар адамда оңай олжаға жетем деген жалған сенім қалыптастырады. Бұл уақыт өте келе тәуелділікке әкелуі мүмкін.

Ал мамандардың айтуынша, бұл автоматтардың қызметі нақты заңмен реттелмеген. Сондықтан оларды орнату заң бұзушылық болып саналмайды.