Бүгін республикалық референдум аясында «Референдум – 2026» атты онлайн марафон өз жұмысын бастады, – деп хабарлайды «Dalamedia» ақпараттық порталы. Ауқымды шараны Қазақстан ұйымдастырып отыр.
Марафон сағат 09:00-де басталып, түнгі 01:00-ге дейін жалғасады. 16 сағатқа созылатын шара барысында қоғамдағы өзекті мәселелер талқыланып, ел дамуына қатысты бастамалар мен инновациялық жобалар таныстырылады. Шараны 100 домбырашы «Балбырауын» күйімен ашты.
Іс-шара барысында алғаш рет отандық өнертапқыштардың жасаған роботтары марафон жүргізушілеріне көмек көрсетеді, ал голограмма технологиясы арқылы еліміздің жетістіктері мен жаңалықтары көрермен назарына ұсынылады.
Марафонда бес негізгі алаң жұмыс істейді:
- Басты сахна – қоғам қайраткерлері, сарапшылар мен танымал тұлғалардың қатысуымен өтетін негізгі пікірталас алаңы;
- Ток-шоу алаңы – білім беру, креатив индустрия, цифрландыру, жасанды интеллект және жастар мәдениетіне қатысты өзекті тақырыптар талқыланатын студия;
- Инновация алаңы – жасанды интеллект жобалары, роботтар, отандық стартаптар мен IT өнімдер таныстырылатын арнайы кеңістік. Мұнда роботтандыру мен ЖИ бағытындағы жаңа бастамалар алғаш рет ұсынылады;
- Орталық коммуникациялар алаңы – республикалық референдумның өту барысы жөнінде ресми органдар өкілдері мен сарапшылар әр екі сағат сайын тікелей эфирде ақпарат береді;
- Экспресс-камера – қатысушылар мен көрермен пікірін көрсетуге арналған интерактивті формат. Журналистер блиц-сұхбат арқылы азаматтардың шараға қатысты көзқарасын жеткізеді.
Марафон барысында «Киберспорт», «Инклюзивті қоғам», «Әйелдер мен балалардың құқықтары», «Бала тәрбиесі: дәстүр мен заман сабақтастығы», «Патриотизм», «Жасанды интеллекттің дамуы», «Креатив индустрия», «Волонтерлік – жаңа азаматтық мәдениет», «Білім беру», «Ұлттық мерекелер», «Ұлттық музыка – жаңа форматта», «Коучинг қызметін реттеу» секілді өзекті тақырыптар талқыланады.
Шараға АҚШ, Ресей, Түркия, Қытай, Бельгия мемлекеттерінен, сондай-ақ еліміздің аймақтарынан меншікті тілшілер тікелей қосылып отыр. Инновация алаңында отандық өнертапқыштардың жобалары таныстырылды. Олардың қатарында Aleem ағылшын тілін үйрету қосымшасының авторы Асылжан Алтай, механикалық жүрек жобасының авторы Аделия Анаш, сал ауруы диагнозы бар адамдарға арналған жаңа арба және майтабан диагнозын анықтайтын «ақылды» ұлтарақ жобалары бар.
Сонымен қатар, Төтенше жағдайлар департаменті өрт сөндіруге арналған робот мүмкіндіктерін көрсетеді. Жасанды интеллект арқылы жұмыс істейтін робот иттер белгіленген аумақты аралап, бейнеақпаратты басқару орталығына жібереді. Шахтерлер қауіпсіздігіне арналған «Mainsafe» смарт-қолғап, сондай-ақ ластанған ауадан принтерге арналған қара бояу өндіруге мүмкіндік беретін инновациялық жоба көпшілікке таныстырылады.
Халықаралық UAE SWAT Challenge турнирінде әйелдер арасында бірінші орын алған «Томирис» арнайы жасағы өз тәжірибесімен бөліседі. Іс-шараға саясаткерлер, сарапшылар, қоғам қайраткерлері, өнер және спорт өкілдері қатысады. Солардың қатарында киберфутболдан Қазақстан ұлттық құрамасының ойыншысы Абылайхан Ахметов, әлем чемпионы Ризабек Айтмұхан және басқа да танымал тұлғалар бар.
Онлайн марафон ресми түрде отандық БАҚ-тың YouTube, Facebook, Instagram, TikTok, Telegram парақшаларында көрсетіледі. «Референдум – 2026» арнайы Telegram арнасы да жұмыс істеп, көрермендер шараның онлайн нұсқасына қосыла алады.
Наурызнама онкүндігі аясында – Қайырымдылық күніне орай «Қайырымды жан» номинациясының жеңімпаздары марапатталады. Шара барысында BAYANSULU, AUKA, KOBA сияқты жас әншілер өнер көрсетеді. Марафонға DJ MONOGAMM музыкамен сүйемелдік жасайды.
Республикалық онлайн марафон қоғамдағы өзекті мәселелерді талқылауға, пікір алмасуға және еліміздің инновациялық жобаларын көпшілікке таныстыруға арналған ірі ақпараттық алаң болып отыр.
DALAMEDIA admin
9
0