Мемлекет басшысы Қасым-Жомарт Тоқаев “Кітап оқу мәдениетін дамыту және зерделі ұлт қалыптастыру жөніндегі шаралар туралы” жарлыққа қол қойды,,-деп хабарлайды «Dalamedia» ақпараттық порталы. Құжат елде кітап оқу мәдениетін нығайтуға және зерделі ұлт қалыптастыруға бағытталған.

Жарлықта мәдениет, білім беру және инновация салаларындағы мемлекеттік саясаттың негізгі басымдықтары айқындалған. Атап айтқанда, кітап оқу мәдениетін дамыту және зерделі ұлт қалыптастыру ісі бірінші кезекке қойылады. Сондай-ақ оқырмандарға арналған заманауи инфрақұрылымды жетілдіру, цифрлық құралдарды кеңінен енгізу, жаңа форматтағы кітапханалар мен қоғамдық кеңістіктер ашу көзделген.

Бұдан бөлек, жас ұрпақты Конституция қағидаттарын құрметтеу рухында тәрбиелеуге үлес қосып жүрген отандық қаламгерлерді қолдау, баспагерлер мен кітап таратушылардың жұмысын ынталандыру және ұлттық әдеби мұраны ел ішінде әрі шетелде кеңінен насихаттау міндеті жүктеледі.

Үкіметке бірқатар нақты тапсырмалар берілген. Атап айтқанда, балалар мен жастар арасында кітап оқу мәдениетін дамытуға арналған кешенді шараларды іске асыру, оқырман инфрақұрылымын жаңғырту, жаңа форматтағы кітапханалар мен көпфункционалды қоғамдық кеңістіктер құру көзделеді.

Сондай-ақ ұлттық әдебиетті сапалы аудару және тарату арқылы оның қолжетімділігін арттыру, 2026 жылдың 1 қыркүйегіне дейін “Жылдың 10 оқырманы” жобасын іске қосу міндеті қойылған. Бұдан бөлек, 2027 жылға дейін “Зерделі ұлт” тұжырымдамасын бекіту, “Кітапхана және кітап шығару ісі туралы” жаңа заң жобасын әзірлеу, Ұлттық сыйлық тағайындау және бірыңғай Ұлттық цифрлық кітапхана платформасын құру жоспарланған.

Жыл сайын атқарылған жұмыстардың нәтижесі Президент Әкімшілігіне есеп ретінде ұсынылады. Жарлық қол қойылған күннен бастап күшіне енеді.