Түркі мемлекеттері ұйымына мүше елдердің басшылары Түркістандағы Қожа Ахмет Ясауи кесенесіне барып, тарихи-рухани мұрамен танысты, -деп хабарлайды «Dalamedia» ақпараттық порталы.

Қазақстан, Әзербайжан, Қырғызстан, Түркия және Өзбекстан президенттері түркі халықтары үшін айрықша маңызға ие киелі орындардың бірі саналатын Қожа Ахмет Ясауи кесенесіне зиярат етті. ЮНЕСКО-ның Бүкіләлемдік мұралар тізіміне енген тарихи нысанда мемлекет басшылары Қожа Ахмет Ясауидің және кесене аумағында жерленген өзге де тарихи тұлғалардың рухына тағзым жасады.

Сапар барысында Түркия президенті Режеп Тайып Ердоған кесенеге османдық каллиграф Ахмед Шемседдин Карахисаридің қолынан шыққан Құран кітабын тарту етті.

Қонақтарға XIV ғасырдың соңында Әмір Темірдің тапсырмасымен бой көтерген кесене туралы мәлімет берілді. Тарихи ғимарат 35 бөлмеден тұрады. Ішкі биіктігі 39 метр болса, сыртқы биіктігі 41 метрге жетеді.

Мәртебелі меймандар кесенедегі қабірхана, орталық залдағы қазандық, әйгілі Тайқазан мен қола лауханы аралап көрді. Сондай-ақ экспозицияда түркі-ислам өркениетіне ортақ құнды мұралар таныстырылды. Олардың қатарында Қожа Ахмет Ясауидің «Диуани Хикметі», Низамидің «Хамсасы», Науаи ғазалдары, Фирдоусидің «Шахнамасы», Физулидің «Ләйлі мен Мәжнүн» дастаны және «Манас» жырынан үзінділер бар.