Мемлекет басшысы Қасым-Жомарт Тоқаев Анталияда өткен дипломатиялық форумның панельдік сессиясына қатысып, Таяу Шығыстағы ахуалға байланысты пікірін білдірді,-деп хабарлайды «Dalamedia» ақпараттық порталы.

Президент өз сөзінде қазіргі халықаралық жағдайда мемлекет көшбасшылары ең алдымен бейбітшілік пен қауіпсіздікке жауапкершілікпен қарауы тиіс екенін айтты. Оның пікірінше, күрделі геосаяси шиеленістер кезінде ең маңыздысы – байыптылық пен сабыр.

Тоқаев әлемдегі түйткілдерді шешуде эмоцияға берілмей, стратегиялық ұстамдылық таныту қажет екенін атап өтті. Ол көптеген мәселелерді келіссөз арқылы реттеуге болатынын да жеткізді.

Мемлекет басшысы Таяу Шығыстағы жағдайға арнайы тоқталып, әсіресе Иран айналасындағы ахуалдың күрделілігін сөз етті. Қазақстан бұл өңір елдеріне тілектестік білдіретінін айтып, тараптарды әскери қимылдарды тоқтатып, диалогқа оралуға шақырды.

Сондай-ақ ол қақтығыстардың салдары ауыр екенін еске салып, оның экономикаға да кері әсер еткенін айтты. Ормуз бұғазы арқылы кеме қатынасына қатысты шектеулерге назар аударған Президент, бұл аймақтың бұрын еркін саудаға ашық болғанын да атап өтті.

Тоқаевтың айтуынша, қазіргі даулы мәселелердің өзегінде ядролық технология мен ядролық қарудың таралу қаупі тұр. Сондықтан бұл тақырып Иранға қатысты келіссөздердің басты бағытына айналуы қажет.

Айта кетейік, бұған дейін Қасым-Жомарт Тоқаевтың Түркия президенті Режеп Тайып Ердоғанның шақыруымен Түркияға сапарлайтыны хабарланған болатын.