Дональд Трамп Иранға қарсы әскери әрекеттер жуырда тоқтауы мүмкін екенін мәлімдеді, — деп хабарлайды «Dalamedia» ақпараттық порталы DW-ға сілтеп.

АҚШ президентінің сөзінше, алдағы 2–3 апта ішінде соғыс аяқталуы мүмкін. Олар Тегеранмен келісімге келіп, Ормуз бұғазын ашуды көздемейді. Құрама Штаттардың басты мақсаты — Иранның ядролық қару жасауының алдын алу. Трамптың айтуынша, бұл мақсат орындалған.

Ал CNN телеарнасы жария еткен мәліметтерге сүйенер болсақ, АҚШ Иранның әскери күшін толық жоюды көздейді. Сәйкесінше, осы операция алдағы 2-3 аптада аяқталмаса, мерзім ұзаруы мүмкін.

Сондай-ақ Ақ үй басшысы өзара келісім арқылы қақтығысты аяқтауға болатынын жеткізді. Оның пікірінше, Иран билігі де бұған қарсы емес. Алайда ол келісім жағдайға айтарлықтай әсер етпейді деп санайды.

Трамптың сөзінше, Ормуз бұғазы арқылы теңіз жолдарының жабылуы салдарынан туындаған энергия ресурстарының тасымалын өзге мемлекеттер өздері шешуі тиіс. Сонымен бірге ол шиеленіс салдарынан мұнай бағасының 50%-ға қымбаттағанын да тілге тиек етті. АҚШ-тың шабуылдары тоқтаған кезде баға қайта түсуі мүмкін.

Еске сала кетсек, АҚШ пен Израиль 28 ақпаннан бастап Иран аумағына әуе соққыларын жасауда. Бұл шабуылдар салдарынан Иранның жоғарғы жетекшісі Әли Хаменеи және бірқатар жоғары лауазымды тұлғалар қаза тапты. Өз кезегінде Иран Израильге және Парсы шығанағындағы елдерге зымыран мен дрон арқылы соққы беріп жатыр.