Иран, АҚШ пен Израиль ел билігін құлатуға әрекет жасаса, Израиль аумағындағы стратегиялық нысандарға соққы жасалуы мүмкін екенін мәлімдеді. Нақтырақ айтсақ, Тель-Авивтегі Негев шөлінде орналасқан ядролық реактор нысанаға алынуы ықтимал, деп хабарлайды «Dalamedia» ақпараттық порталы ирандық ISNA агенттігіне сілтеме жасап.

Басылымның мәліметінше, ирандық әскерилердің бірі АҚШ пен Израиль Ирандағы саяси билікті өзгертуге талпынса, Тегеран Израильдің оңтүстігіндегі Димона ядролық зерттеу орталығы нысанын нысанаға алуы мүмкін екенін ескерткен.

Аталған зерттеу орталығы Негев шөлінде, Димона қаласына жақын жерде орналасқан. Нысан 1964 жылы іске қосылған. Оның құрамында табиғи уранмен жұмыс істейтін ауырсулы зерттеу реакторы бар.

Айта кетейік, бұған дейін АҚШ пен Израиль Иранға қарсы әскери операция бастағанын мәлімдеген. Тель-Авив бұл қадамды Тегеранның ядролық қару иеленуіне жол бермеу екенін алға тартса, Вашингтон Иранның әскери инфрақұрылымын жою ниетін білдірген.

Ал Иранда АҚШ пен Израиль шабуылдарының салдарынан кемінде мыңдаған адам қаза тапқан. Олардың арасында Иранның жоғарғы көшбасшысы Али Хаменеи де бар.

Сонымен қатар Дональд Трамп әскери операция бастапқыда жоспарланған төрт-бес аптадан ұзаққа созылуы мүмкін екенін жоққа шығармады. Ал АҚШ мемлекеттік хатшысы Марко Рубио Иранға қарсы соққылар күшейтілуі ықтимал екенін мәлімдеді.