Израильдің әскері Ливан аумағында «Хезболла» қозғалысына қарсы шабуылын бастағанын мәлімдеді, – деп хабарлайды «Dalamedia» ақпараттық порталы.

Бұл туралы Израиль армиясы Бас штабының бастығы Эяль Замир әскери кеңес барысында айтты. Оның сөзінше, бұған дейін қорғанған әскер шабуылға көшкен.

«Біз «Хезболлаға» қарсы шабуыл науқанын бастадық. Енді тек қорғаныспен шектелмейміз. Алда ұзаққа созылатын қақтығыстарға дайын болу керек», – деді ол.

Бұған дейін ливандық «Хезболла» Израильдің Хайфа қаласына зымыран және дрондар арқылы соққы жасаған. Мәліметтерге сүйенсек, олардың бір бөлігі әуе қорғанысы жүйелері арқылы жойылып, қалғаны ашық аумақтарға түскен. Осыдан кейін Израиль әскері Ливан аумағындағы ұйым нысандарына соққы бере бастаған.

Шетелдік БАҚ-тың хабарлауынша, әуе шабуылы салдарынан «Хезболланың» саяси қанатының жетекшісі Мохаммед Раад қаза тапқан. Ол Ливан парламентіндегі «Қарсылыққа адалдық» блогын басқарған.

Сондай-ақ Бейрут қаласының оңтүстік маңына жасалған соққылардан кемінде 10 адамның көз жұмғаны хабарланды.

Еске салайық, 28 ақпанда АҚШ пен Израиль Иранға қарсы ауқымды әскери операция бастағанын жариялаған. Тель-Авив бұл қадамды Тегеранның ядролық қару иеленуіне жол бермеу мақсатымен түсіндірген. Ал АҚШ президенті Дональд Трамп Иранның әскери әлеуетін жою ниетін білдіріп, ел азаматтарын билікке қарсы шығуға шақырған.