Мемлекет басшысы Қасым-Жомарт Тоқаев жұмыс сапарымен Өзбекстанға барып, Бұхара қаласына табан тіреді, — деп хабарлайды «Dalamedia» ақпараттық порталы.

Әуежайда Қазақстан Президентін Өзбекстан басшысы Шавкат Мирзиёев қарсы алды.

Сапар аясында екі ел басшылары бейресми кездесу өткізіп, шаһардағы тарихи әрі өндірістік нысандарды аралады. Алдымен мемлекеттер басшылары Бахауддин Нақышбанди мемориалдық кешеніне барып, зиярат етті. Кесене құрамына кіретін медресе, мешіттер мен мұнараны аралап көрген олар Құран оқытып, бауырлас халықтарға амандық пен береке тіледі. Сондай-ақ келушілермен тілдесіп, естелік суретке түсті.

Бұдан кейін Қасым-Жомарт Тоқаев пен Шавкат Мирзиёев бейресми кездесу өткізді. Қазақстан Президенті өзбек тарапына алғыс айтып, бұл сапардың қазіргі күрделі геосаяси жағдайда маңызы ерекше екенін атап өтті. Оның айтуынша, Өзбекстан — Қазақстанның сенімді стратегиялық серіктесі, ал екі ел арасындағы келісімдер кезең-кезеңімен жүзеге асуда.

Президент Бұхараның бай тарихына да тоқталып, оны Шығыстың рухани әрі зияткерлік орталықтарының бірі ретінде бағалады. Қасым-Жомарт Тоқаев екі ел арасындағы тарихи байланыстар бүгінгі стратегиялық серіктестіктің берік негізі екенін атап өтіп, Өзбекстан Президентінің реформаларын қолдайтынын білдірді. Сондай-ақ жаңа Конституцияға байланысты алғашқылардың бірі болып құттықтау жолдағаны үшін ризашылығын жеткізді.

Кездесу барысында Мемлекет басшысы Өзбекстанның «Таза ауа» бастамасына қолдау білдіріп, оны бірлесіп жүзеге асыруды ұсынды. Бұл мәселенің Алматы үшін де өзекті екенін айтып, экологиялық жағдайды жақсартуға бағытталған ортақ жобалардың маңызын атап өтті.

Өз кезегінде Шавкат Мирзиёев бұл сапардың екі ел арасындағы достық пен бауырластықты нығайта түсетінін айтты. Оның пікірінше, ашық әрі сенімді диалог өзара ынтымақтастықты жаңа деңгейге көтеруге жол ашады.

Өзбекстан Президенті Қазақстандағы реформаларға жоғары баға беріп, ел экономикасының өсімі, цифрландыруға басымдық берілуі және халықаралық беделінің артуын ерекше атап өтті. Сондай-ақ Қасым-Жомарт Тоқаевтың бастамалары аймақтық және жаһандық деңгейде қолдау тауып отырғанын жеткізді.

Келіссөз барысында тараптар экономикалық серіктестікті кеңейтуге ниетті екенін жеткізді. Сауда, өндіріс, сирек металдар, көлік-транзит, су-энергетика және IT салаларындағы бірлескен жобалар талқыланды. Сонымен бірге мәдени-гуманитарлық байланыстар мен туризмді дамыту мәселелері де назардан тыс қалмады.

Кездесу қорытындысында екі ел үкіметтері сауда-экономикалық ынтымақтастықты одан әрі дамытуға арналған «жол картасын» қабылдауға уағдаласты.