Өзбекстан өз тарихында алғаш рет өз ғарышкерін ғарышқа жіберуге қамдануда. Бұл туралы ел президенті Шавкат Мирзиёев жыл қорытындысы бойынша халыққа және парламентке арнаған Жолдауында мәлімдеді.
Мемлекет басшысының айтуынша, ресми Ташкент жасанды жер серігін және тұңғыш өзбек ғарышкерін ұшыру бағытындағы жұмыстарды бастап кеткен.
– Бүгін тағы бір маңызды жаңалықпен бөліскім келеді. Тәуелсіз Өзбекстан тарихында алғаш рет біз ғарышқа жасанды спутник пен өз еліміздің азаматы болатын тұңғыш ғарышкерді ұшыру бойынша дайындықты бастадық. Бұл бастама жаңа Өзбекстанның ғылыми-техникалық дамуына серпін беріп, ұлттың ілгерілеуін жаңа деңгейге көтереді деп сенемін, – деді Шавкат Мирзиёев.
Президент бұл мақсатқа жету үшін ІТ саласын дамыту шешуші рөл атқаратынын атап өтті. Оның сөзінше, 2030 жылға қарай ІТ қызметтер экспорты 5 млрд долларға дейін жеткізілмек.
Сонымен қатар алдағы жылдары Ташкент, Бұхара, Ферғана қалаларында және Ташкент облысында төрт деректер орталығы, екі суперкомпьютер мен жасанды интеллект зертханалары іске қосылады. Бұл медицина, көлік, ауыл шаруашылығы, геология және қоғамдық қауіпсіздік салаларында 100-ден астам жасанды интеллект жобасын жүзеге асыруға мүмкіндік береді.
DALAMEDIA admin
8
0