Премьер-министрдің орынбасары Қанат Бозымбаев тұрғын үй-коммуналдық шаруашылық саласындағы аймақтық түйіткілдерді 2027 жылға дейін шешуді тапсырды, — деп хабарлайды «Dalamedia» ақпараттық порталы.

Вице-премьер «Энергетика және коммуналдық секторларды жаңғырту жөніндегі ұлттық жобаға» арналған жобалық кеңсе отырысын өткізіп, саланың қазіргі ахуалын талқыға салды.

Бүгінде 2026 жылға жоспарланған инвестиция көлемі 1,2 трлн теңгеге жеткен. Оның 634 млрд теңгесі ұлттық жоба аясында қарастырылса, тағы 542 млрд теңге тарифтік саясат арқылы жүзеге асатын инвестициялық бағдарламаларға тиесілі.

Электронды платформа арқылы жалпы құны 482 млрд теңге болатын 206 жоба конкурсқа дайындалған. Оның ішінде 168 жоба нақты іске асырылуда.

Жиында Бозымбаев әкімдіктерге тұрғын үй-коммуналдық шаруашылықтағы «қызыл аймақ» мәселесін 2027 жылға дейін толық шешуді тапсырды. Сондай-ақ сәуір айының соңына дейін барлық жобалар бойынша, өтінімдерді толықтай жүйеге енгізу тапсырылды.

Вице-премьер тапсырмалардың мерзімінде әрі сапалы орындалуына ерекше мән берілетінін ескертті.