Қырғызстанда балаларға ине салынған кәмпит берген деген күдікпен Н.Д. есімді ер адам ұсталды,-деп хабарлайды «Dalamedia» ақпараттық порталы.

Оқиға 28 наурыз күні кешке Бішкектегі «Ақ-Ордо» тұрғын алабында болған. Ленин аудандық ішкі істер басқармасының мәліметінше, жергілікті тұрғын полицияға арыз түсірген. Оның айтуынша, 11 жастағы қызы мен басқа да балалар бейтаныс ер адамнан кәмпит алған, кейін тәттілердің ішінен ине сынықтары табылған.

Аталған дерек бойынша қылмыстық іс қозғалып, тиісті сараптамалар тағайындалған.

Жедел-іздестіру шаралары барысында күдіктінің кім екені анықталып, ол Н.Д. есімді азамат екені белгілі болды. Қазір ол уақытша ұстау изоляторына қамалды.

Күдіктінің үйіне жүргізілген тінту кезінде кәмпиттер мен іс бойынша маңызды заттай айғақтар алынған.

Құқық қорғау органдары ата-аналарға балаларға бейтаныс адамдардан берілетін кез келген тағамды алмау керегін ескертіп, түсіндіру жұмыстарын күшейтуді сұрады.