Шымкентте 21 жастағы Нұрай Серікбайдың қазасына қатысты іс бойынша күдікті психикалық денсаулық орталығына жатқызылды,-деп хабарлайды «Dalamedia» ақпараттық порталы.

Оқиға қаңтар айында болған. Тергеу дерегінше, 21 жастағы студентке аса қатыгездікпен пышақ жарақаты салынып, ол оқиға орнында көз жұмған. Марқұмды өлтірді деп күдікке ілінген 28 жастағы ер адам бұған дейін қызға үнемі қысым көрсетіп, оның соңынан қалмағаны және алып қашу әрекеті де тіркелгені айтылады.

Қазіргі уақытта іс бойынша айып тағу күшейтіліп, күдіктіге өмір бойына бас бостандығынан айыру жазасы қаралуы мүмкін екені айтылуда. Полиция адам өлтіру және сталкинг баптары бойынша қылмыстық істі тергеп жатыр.

Сонымен қатар, күдіктінің уақытша ұстау изоляторынан Талғардағы психиатриялық орталыққа ауыстырылғаны белгілі болды. Марқұмның туыстары бұл шешімге қатысты түсінбей отырғанын жеткізген.