Шымкент қаласы полиция департаментінде кадрлық ауыс-түйіс болды. Қаладағы резонансты Нұрай Серікбай ісінен кейін департаменттің жаңа басшысы болып Мұхтар Қожаев тағайындалды, -деп хабарлайды «Dalamedia» ақпараттық порталы Ішкі істер министрлігінің баспасөз қызметіне сілтеме жасап.

Ішкі істер министрі Ержан Сәденов Шымкентке арнайы барып, жеке құраммен өткен жиында жаңа басшыны таныстырды. Министрлік мәліметінше, Қожаев – құқық қорғау саласында ұзақ жылдар бойы қызмет еткен, тергеу бағытында тәжірибесі мол офицер.

Жаңа басшы кім ?

Мұхтар Қожаев полиция жүйесіне 1999 жылы қадам басқан. Ол Алматы заң институтын тәмамдағаннан кейін қызметін Маңғыстау облысында тергеуші ретінде бастаған. Алғашқы жылдары қарақшылық пен тонау қылмыстарын ашумен айналысқан.

Кейінгі жылдары Ақтау қаласының ішкі істер басқармасында тергеу және анықтау бөлімшелерін басқарды, басқарма бастығының тергеу жөніндегі орынбасары болды. 2010 жылдан бастап Маңғыстау облысында аудандық полиция бөлімдері мен басқармаларын басқарған.

Одан кейінгі қызмет жолы Ішкі істер министрлігінің орталық аппаратында жалғасты. Тергеу комитетінде, кейін Тергеу департаментінде алдын ала тергеуді ұйымдастыру және аймақтық бақылау бағытында жұмыс істеді. 2018 жылы Қостанай облысы полиция департаменті бастығының орынбасары қызметіне тағайындалды. 2023 жылдың желтоқсанынан бері ІІМ Тергеу департаментін басқарған.

Бұл тағайындау Шымкентте қоғамды дүр сілкіндірген Нұрай Серікбайдың өлімінен кейін жүзеге асқанын айта кеткен жөн. 11 қаңтарда қалада 21 жастағы студент қыз пышақ жарақатынан қаза тапқан еді. Әлеуметтік желіге тараған бейнежазбада қыздың қашуға тырысқаны, қарсылық көрсеткені, алайда күдіктінің оны қатыгездікпен өлтіргені анық көрінеді.

Қылмыстан кейін күдікті оқиға орнынан бой тасалағанымен, екі күннен соң полиция тарапынан ұсталды. Ол марқұммен таныс болған 28 жастағы жергілікті тұрғын болып шықты. Қазір ол қамауда.

Аталған оқиғадан кейін Шымкент қаласы полиция департаментінің бұрынғы басшысы Нұрлан Алмасбеков пен оның бірінші орынбасары қызметінен босатылды. Мемлекет басшысы Қасым-Жомарт Тоқаев та бұл іске назар аударып, полиция қызметінің әрекетіне баға беруді тапсырған болатын.