Алматы облысында шетел мемлекетінің мемлекеттік туын өртегендерге қатысты қылмыстық іс қозғалды. Оқиға 13 қараша күні Ұйғыр ауданында тіркелген. Полицияның мәліметінше, бір топ азамат рұқсатсыз жиналып, шетел мемлекетінің туын және сол ел басшылығының суретін өртеген.

Облыстық полиция департаментінің хабарлауынша, іс материалдары сотта қаралып, 12 адам ӘҚБтК-нің 434-бабы бойынша 15 тәулікке дейін әкімшілік қамаққа алынған. Сонымен қатар алты қатысушыға 20 АЕК көлемінде - 78 640 теңге айыппұл салынған.

Бұл фактіге қатысты Қылмыстық кодекстің «Өшпенділік немесе араздық қоздыру» бабымен қылмыстық іс қозғалып, тергеу жүргізіліп жатыр.

Полиция қоғамдық тәртіпті бұзатын, жат әрекеттерге итермелейтін және мемлекеттік рәміздерге қол сұғатын кез келген әрекет заң бойынша қатаң түрде тоқтатылатынын атап өтті.