Қордай аудандық полиция бөлімінің жедел әрекет ету арнайы жасағы орналасқан казарма дәлізінде 1995 жылы туған инспектор өзіне қол жұмсаған. Ол қызметтік қарудан, алдын ала дерек бойынша SIG Sauer тапаншасынан, самай тұсына оқ атқан,-деп хабарлайды «Dalamedia» ақпараттық порталы. Оқиға орнына жеткен медицина қызметкерлері оны ауыр халде аудандық орталық ауруханаға жеткізген.

Алайда кешкі уақытта дәрігерлердің барлық көмегіне қарамастан, ол жансақтау бөлімінде көз жұмды.

Қазіргі уақытта оқиғаның мән-жайы мен себептері анықталып жатыр. Аталған дерек бойынша “Өзін-өзі өлтіруге дейін жеткізу” бабымен қылмыстық іс қозғалған.

Бұған дейін Қорғаныс министрлігінің мәліметінше, оқ жарақатын алған тағы бір сарбазға қатысты жағдай тіркелген. Алдын ала болжам бойынша, оқиға қарумен жұмыс істеу кезіндегі қауіпсіздік талаптарының бұзылуынан болуы мүмкін. Тергеу амалдары жүргізілуде.