Қазақстан Қарулы күштерінде қызмет ететін әскери қызметшілерге көрсетілетін материалдық көмек көлемі артты. Енді оның ең жоғарғы мөлшері 425 мың теңгеге дейін жетуі мүмкін,-деп хабарлайды «Dalamedia» ақпараттық порталы.

Қорғаныс министрлігі бекіткен жаңа бұйрық 21 сәуірден бастап күшіне енген. Құжатқа сәйкес, енді материалдық көмек мөлшері ең төменгі жалақыға байланысты еселеніп есептеледі. Биыл ең төменгі жалақы 85 мың теңгені құрайды.

Жаңа тәртіп бойынша, әскери қызметшінің жақын туыстары, жұбайы немесе қайын жұрты қайтыс болған жағдайда берілетін көмек ең төменгі жалақының бес есесіне дейін, яғни 425 мың теңгеге дейін төленуі мүмкін. Ал неке қию, бала туу, бала асырап алу, мүліктік зиян келу немесе емделуге байланысты жағдайларда төлем көлемі ең төменгі жалақының үш есесіне дейін, шамамен 255 мың теңгеге дейін жетеді.

Сонымен қатар құжатта «істі және лауазымды қабылдау күні» мен «істі және лауазымды тапсыру күні» деген жаңа ұғымдар енгізілген. Бұл күндер командир бұйрығымен бекітіліп, ақшалай төлемдерді есептеу кезінде негізге алынады.

Әскери қызметтен теріс себептермен босатылған жағдайда сауықтыру жәрдемақысы айдағы нақты күндерге қарай есептелетіні де нақтыланған.

Бұдан бөлек, әскери қызметшілерге сыйақы беру тәртібі де айқындалды. Олар ерекше маңызды немесе күрделі тапсырмаларды орындағаны, жоғары нәтижеге қол жеткізгені және қызметтік міндеттерін үлгілі атқарғаны үшін марапатталуы мүмкін. Сондай-ақ сыйақылар мемлекеттік және кәсіби мерекелерде, мерейтойларда, 40 жасқа толған кезде және одан кейін әр бес жыл сайын беріледі.

Айта кетейік, бұған дейін әскери борышын өтеген қазақстандық сарбаздарға жоғары оқу орындарына грант берілгені хабарланған болатын.