Жамбыл облысының Қордай ауданында 9-сыныпта оқитын екі оқушының өзіне қол салу дерегі бойынша қылмыстық іс қозғалды, -деп хабарлайды «Dalamedia» ақпараттық порталы.

Олардың денелері Қаракемер ауылындағы сарай ішінен табылған. Оқиға 15 сәуір күні таңғы сағат 06:00 шамасында болғаны айтылды.

Облыстық полиция департаментінің мәліметінше, бұл дерек бойынша Қылмыстық кодекстің 105-бабы — «Өзін-өзі өлтіруге дейін жеткізу» бойынша іс қозғалған. Қазіргі уақытта оқиғаның мән-жайын толық анықтауға бағытталған тергеу амалдары жүргізіліп жатыр.

Қылмыстық-процестік кодекстің 201-бабына сәйкес, тергеу мүддесіне байланысты өзге ақпарат жария етілмейтіні де атап өтілді.

Сонымен қатар облыс әкімі Ербол Қарашөкеевтің тапсырмасымен оқиға орнына орынбасар Айжан Есмағамбетова мен білім басқармасының басшысы Нұрбек Оршубеков барған.

Облыс әкімдігі жағдай бақылауда екенін және оқушылар мен ата-аналарға психологиялық көмек көрсету жұмыстары ұйымдастырылғанын мәлімдеді.