Екібастұз қаласында араға екі күн салып 17 жастағы бозбала мен қыздың өзіне қол жұмсағаны туралы ақпарат тарады. Кейін бұл деректі Павлодар облысының полиция мамандары растады.

Ведомство мәліметінше, әр факті бойынша қылмыстық іс қозғалып, сотқа дейінгі тергеу амалдары жүргізіліп жатыр. Оқиғаның нақты мән-жайы тергеу барысында анықталады.

Өңірлік бала құқықтары жөніндегі уәкіл Сәуле Шәкенева марқұмдардың 2008 жылы туғанын, бұрын бір сыныпта оқығанын және өзара достық қарым-қатынаста болғанын хабарлады. Оның айтуынша, жігіт Екібастұздағы мектептердің бірінде 11-сыныпта білім алған, ал қыз жергілікті колледждің бірінші курсында оқыған.

«Екі жасөспірім де жағдайы жақсы отбасынан шыққан. Оларды туыстары өз үйлерінен тапқан», – деді уәкіл.

Сондай-ақ тексеру барысында жасөспірімдер оқыған білім беру ұйымдарында буллинг деректері анықталмаған. Олар профилактикалық есепте тұрмаған және бұған дейін психологиялық қызметтердің назарында болмағаны анықталды.

Әлеуметтік желіде бозбаланың қазасынан кейін екі күн өткен соң қыздың да өзіне қол салғаны туралы мәлімет тараған. Алайда ресми органдар бұл ақпаратқа қатысты түсініктеме бермей, барлық жайттың тергеу аясында қаралып жатқанын мәлімдеді.

Сәуле Шәкеневаның сөзінше, бұл – жыл басынан бері өңірде кәмелетке толмағандар арасында тіркелген алғашқы суицид фактілері.