Екібастұз қаласында ауыр қылмыс тіркелді. Белгілі деректерге сүйенсек, тұрмыстық жанжал кезінде бір адам қаза тауып, тағы бір әйел пышақ жарақатымен ауруханаға жеткізілген.

Әлеуметтік желілерде тараған бейнежазбадан оқиғаның көпқабатты тұрғын үйдің кіреберісінде болғаны байқалады. Кадрларда үсті-басы қанға боялған әйелдің баспалдақпен төмен түскені көрінеді. Оның артынан ілескен күдікті әлсіреп отырған жәбірленушіні ұрып-соғып, кейін бірнеше рет пышақтаған.

Аталған деректі Павлодар облыстық полиция департаменті растады. Ведомство мәліметінше, оқиға 9 қаңтар күні болған.

«Алдын ала анықталғандай, алкогольдік мас күйде болған адамдар арасында тұрмыстық жанжал туындаған. Жанжал барысында бір ер адам бірнеше пышақ жарақатын алып, оқиға орнында көз жұмды. Сонымен қатар тағы бір әйел жарақат алып, медициналық мекемеге жеткізілді», – деп хабарлады полиция өкілдері.

Қазіргі уақытта күдікті ұсталып, уақытша ұстау изоляторына қамалды. Аталған факті бойынша кісі өлтіру және кісі өлтіруге оқталу баптарымен қылмыстық іс қозғалып, тергеу амалдары жүргізіліп жатыр.