Атыраудағы «Геолог» шағынауданындағы үй маңынан табылған Наурыз Мұқанғалиев пен Мейрамгүл Қарабалинаның денелерінде өткір заттан қалған жарақат белгілері анықталды, — деп хабарлайды «Dalamedia» ақпараттық порталы.

Бұл туралы облыстық полиция департаменті бастығының бірінші орынбасары Құттыбай Садықов мәлімдеді. Оның айтуынша, өлімнің нақты себебі мен қай уақытта болғаны сот-медициналық сараптама қорытындысынан кейін белгілі болады.

«Марқұмдардың денесінде өткір затпен салынған жарақаттар бар. Қазір сот-медициналық сараптама тағайындалды», — деді Құттыбай Садықов.

Бұған дейін полиция Атырау облысының Жангелдин ауылында бір отбасы мүшелерін өлтірді деген күдікке ілінген Сұлтан Сәрсемалиевті тергеу әрекеттерін жүргізу үшін оқиға орнына жеткізген еді.

Тергеу барысында күдікті қылмыстың қалай жасалғанын көрсетіп берген. Ол қайын атасы мен қайын енесін өлтіріп, кейін ауладағы қора ішінде шамамен 1,5 метр тереңдікте шұңқыр қазып, мәйіттерді сол жерге көмген. Қылмыстың ізін жасыру үшін үстіне диван қойған.

Еске сала кетейік, бұған дейін Атырау облысындағы Жангелдин ауылынан ерлі-зайыпты мен олардың екі ересек баласы бар отбасының хабар-ошарсыз кеткені белгілі болған.

6 қаңтарда үйдің жанындағы қорадан ерлі-зайыптылардың мәйіті табылды. Кейін құқықтық статистика және арнайы есепке алу органдарының порталында күдікті ретінде марқұмдардың күйеу баласы Сұлтан Сәрсемалиевтің аты-жөні көрсетілді. Ол жұбайымен бірге халықаралық іздеуге жарияланған.

Кейін күдіктілер Индонезияда ұсталып, елге жеткізілгені белгілі болды.