27 қаңтарда қаза тапқан сарбаз Е. Рустемұлының өліміне байланысты қозғалған қылмыстық іс бойынша тергеу аяқталды — деп хабарлайды «Dalamedia» ақпараттық порталы. Сабаз қаруды пайдалану кезінде жарақаттанып, қаза болған еді.

Бас әскери прокуратураның мәліметінше, Гвардейск гарнизонындағы әскери бөлімнің рота командирі қызметіне салғырт қараған. Тергеу барысында оның жеке құрамның қызметін тиісті деңгейде бақыламағаны және әскери қызметшілердің қаруды қолдануын қадағаламағаны анықталған.

Сонымен қатар, айыпталушының қаза болған сарбаздың қаруластарына қатысты билігін асыра пайдаланғаны анықталған.

Жиналған дәлелдер негізінде қылмыстық іс сотқа жолданды.

Ал сарбаздың қазасына қатысты өзге де мән-жайларды анықтау жұмыстары жалғасып жатыр. Істің барысы Бас әскери прокуратураның ерекше бақылауында. Қылмыстық-процестік кодекстің 201-бабына сәйкес, тергеуге қатысты өзге ақпарат жария етілмейді.