Астанада жоғалып кеткен 13 жастағы жасөспірім аман-есен табылды, -деп хабарлайды «Dalamedia» ақпараттық порталы.

9 мамыр күні баланың ата-анасы полицияға хабарласып, оның бір күн бұрын қосымша сабаққа кеткеннен кейін үйге оралмағанын жеткізген. Кейін анықталғандай, жасөспірім ата-анасымен болған түсініспеушіліктен соң өз еркімен үйден шығып кеткен.

Іздестіру жұмыстарына полиция қызметкерлері, Ұлттық ұлан сарбаздары және еріктілер жұмылдырылды. Барлығы жүзге жуық адам жасөспірімді іздеуге қатысқан. Тәртіп сақшылары аула-аумақтарды, кіреберістерді, әлеуметтік және медициналық мекемелерді тексеріп, бейнебақылау камераларын да қараған.

Тексеру барысында оның автобустан соңғы аялдамадан түсіп қалып, кейін тас жол бойымен жаяу жүргені белгілі болды. Жасөспірім түнді Ақжар ауылындағы мешітте өткізген.

Кейін полиция қызметкерлері оны қала сыртындағы тас жол маңынан тауып, аман-есен ата-анасына табыстады.