Жамбыл облысында «Таза Қазақстан» бастамасы шеңберінде «Таза аула» акциясы ұйымдастырылды. 17–18 сәуір күндері өткен шара аясында Тараз қаласының Бәйтерек шағынауданында жалпықалалық сенбілік өтіп, аулалар мен көшелер тазартылып, қоқыс жиналды,-деп хабарлайды «Dalamedia» ақпараттық порталы.

Шараға қатысқан Жамбыл облыстық жастар ресурстық орталығының директоры А.Кадралиев акцияның маңызын атап өтті. Оның айтуынша, «Таза Қазақстан» тек экологиялық бастама ғана емес, қоғамда тазалық мәдениетін қалыптастырып, азаматтық жауапкершілікті арттыратын маңызды қозғалыс. «Таза аула» әр тұрғынды өз ауласының тазалығына бейжай қарамауға шақырады. Мұндай шаралар жастардың экологиялық санасын күшейтіп, туған жерге деген құрметті арттырады», – деді ол.

Сонымен қатар, Жамбыл аудандық жастар ресурстық орталығының қызметкерлері мекеме аумағын көгалдандыру жұмысын қолға алып, игі іске ұйытқы болды. Ал Меркі ауданында білім беру ұйымдарында түлектердің ағаш отырғызу челленджі ұйымдастырылды.

Табиғатқа жанашырлық танытқан қатысушылар қылқанжапырақты ағаштар мен гүл көшеттерін отырғызып, аумақтың ажарын аша түсті. Әрбір егілген тал мен гүл – туған жерге деген сүйіспеншіліктің, экологиялық мәдениеттің және болашаққа деген сенімнің көрінісі.

Жалпы, акция басталғалы бері өңірде 18 мыңнан астам адам мен 850-ден аса ұйым атсалысқан. Осы уақыт аралығында 45,8 мың түп көшет отырғызылып, 1,8 мың шақырым жол мен 410 шақырым арық жүйесі тазартылды. Сондай-ақ 72,4 мың шаршы метр аумақ абаттандырылып, 1,8 мың тоннадан астам қоқыс шығарылған.