Қазақстан бойынша жүзеге асып жатқан «Таза Қазақстан» экологиялық бастамасы аясында өңірде кең көлемді абаттандыру және көгалдандыру жұмыстары жүргізілуде. Бүгін «Таза қала» акциясы шеңберінде облыс аумағында ауқымды сенбілік ұйымдастырылды, -деп хабарлайды «Dalamedia» ақпараттық порталы.

Жалпы шара барысында қала көшелері, аулалар, саябақтар мен қоғамдық орындар тазартылып, тұрмыстық қалдықтар арнайы орындарға шығарылды. Тараз қаласында Сәтбаев көшесіндегі №17 және 19 үйлердің маңына 250 түп ағаш отырғызылды. Игі іске қала тұрғындары, ардагерлер мен жастар белсене атсалысты.

Сондай-ақ, Қызылабад алқабында жасыл желекті көбейту мақсатында 10 мың түп қарағаш егілді. Жоспар бойынша бұл аумақта алдағы уақытта 20 мыңға дейін ағаш отырғызу көзделген.

Экологиялық акция аясында Қарасу-2 каналының бойы тазартылып, арық жүйелері мен су өткізу арналары қалпына келтірілді. Бұл жұмыстар су тасқынының алдын алып, аумақтың санитарлық жағдайын жақсартуға бағытталған.

Осындай шаралар облыстың барлық аудандарында өтті. Қазіргі таңда акцияға 16,8 мың адам мен 850-ден астам мекеме қатысқан. Нәтижесінде 45,8 мың көшет отырғызылып, 1,5 мың шақырым жол желісі, 410 шақырым арық пен канал тазартылды. Сонымен қатар 72,4 мың шаршы метр саябақтар мен скверлер абаттандырылып, 1,8 мың тонна қоқыс шығарылды.

Экологиялық мәдениетті қалыптастыру бағытында да оң өзгерістер бар. Тараз бен Қаратау қалаларында жасыл желектерді цифрландыру жұмыстары жүргізіліп, арнайы ақпараттық платформа іске қосылды. Бұдан бөлек, Telegram-бот арқылы тұрғындардан 263 өтініш түсіп, олардың басым бөлігі дер кезінде қаралған.